சுவாரஸ்யமான ஜெபம்!

ஒரு தொலைதூர கிராமத்தில் ஒரு மிஷனரி வேலை செய்தார்.  கிராம மக்கள் அனைவருடனும் நல்ல உறவை வைத்திருந்தார்.  அவர் ஏற்பாடு செய்த ஞாயிறு ஆராதனை மற்றும் பிற நிகழ்ச்சிகளுக்கு அனைவரையும் அழைப்பது வழக்கம்.  அப்படி ஒருநாள் ஜனங்களை அழைத்த போது குடிப்பழக்கத்திற்கு அடிமையான ஒரு வயதான மனிதர் தேவாலயத்திற்குச் செல்லத் தயங்கினார்.  இப்படியாக ஆண்டுகள் பல ஆனது, ஒருநாள் மிஷனரியை கௌரவிக்க எண்ணி, அவர் சபைக்குச் சென்றார்.  மிஷனரி அவரைக் கவனித்ததை உறுதிப்படுத்திக் கொள்ள, அவர் சபை ஐக்கியம் முடிந்ததும் அவரை வாழ்த்த முன் சென்றார்.  மோசமான குடிகாரனான அவருக்காக;  "ஆண்டவரே தண்ணீரை திராட்சரசமாக மாற்றியது போல், இவருடைய திராட்சைரசத்தை தண்ணீராக மாற்றி இவரை விடுவியும்"  என்று ஜெபித்தார்.‌ இருப்பினும், கர்த்தராகிய இயேசுவின் முதல் அதிசயம், தண்ணீரை திராட்சரசமாக மாற்றியது அவருக்குத் தெரியாது (யோவான் 2:1-10).

 புதிய அதிசயம்:
 அடுத்த நாள், வழக்கம் போல், அவர் மதுபானக் கடைக்குச் சென்று தனது வழக்கமான அளவை உட்கொண்டார்.  ஆனால் அவருக்கு அது எந்த ‘கிக்’கையும் உணர்த்தவில்லை.  அவர் மேற்கொண்டு ஒன்றை ஆர்டர் செய்தார், மறுபடியும் அதே நிலை, எந்த போதையும் ஏறவில்லை. மூன்றாவது முறை ஆர்டர் செய்து குடித்தார், ஒன்றுமே நடக்கவில்லை.  ஆத்திரமடைந்த அவர், பார் மேலாளரிடம், "இது என்ன தண்ணீரா? ஒரு போதையுமே இல்லையே” என்று சத்தமிட்டார். பல தசாப்தங்களாக அவர்கள் இந்த கடையை வைத்து நடத்துவதாகவும் எந்த வகையிலும் ஏமாற்ற மாட்டார்கள் என்றும் அவர் பணிவுடன் கூறினார்.

 புதிய படைப்பு:
 அப்போது அவருக்கு ஒரு காரியம் நினைவிற்கு வந்தது; தண்ணீர் மற்றும் திராட்சை இரசம் தொடர்பாக மிஷனரி செய்த ஜெபம் நினைவுக்கு வந்தது.  அவர் உடனடியாக மிஷனரியிடம் சென்றார், அந்நேரம் மதுவிலிருந்து விடுதலை அடைந்தார்; அதிலிருந்து விடுபட்டதற்காக தனது நன்றியைத் தெரிவித்தார், மேலும் கர்த்தராகிய இயேசு கிறிஸ்துவைப் பின்பற்றினார்.

 புதிய முறை:
 தேவன் பல்வேறு வழிகளில் மக்களை தன்னிடம் இழுக்கிறார், அது எந்த கற்பனைக்கும் அப்பாற்பட்டது.  அந்த நபர் பல ஆண்டுகளாக அழைப்பிற்கு பதிலளிக்கவில்லை என்றாலும், அவர் சென்றபோது தேவன் அவரை ஏற்றுக்கொண்டார்.  மிஷனரி ஆசீர்வாதத்தின் ஒரு வாய்க்காலாக மாறினார். அவரது எளிய ஜெபம் ஒரு நபரை மாற்றியது.  அவரது அன்பு மற்றும் சிரத்தையுடன் கூடிய உழைப்புக்கு வெகுமதி கிடைத்தது.  குடிக்கு அடிமையானவன் தேவ வல்லமையை அனுபவித்து விடுவிக்கப்பட்டான்.

 புதிய தரிசனம்:
 அனைத்து விசுவாசிகளும் உடனடியாக பதிலளிக்காத மக்களைப் பின்தொடர்வதற்கான புதிய தரிசனத்தைக் கொண்டிருக்க வேண்டும்.  அவர்கள் தேவனுடைய ஆவியின் வழிநடத்துதலின்படி ஜெபிக்க வேண்டும்.  தேவன், தம்முடைய இறையாண்மையில், எதிர்பாராத விதங்களில் வல்லமை மற்றும் அற்புதமான காரியங்களைச் செய்வார்.

  நான் தேவனின் கரங்களில் நீதியின் கருவியா?

 Author: Rev. Dr. J .N. மனோகரன்