பெங்களூருவில் ஆகரா ஏரியில், 25 வயது இயந்திரக் கற்றல் (Machine Learning) பொறியாளர் ஒருவர் தற்கொலை செய்து கொண்டார். அவர் பணியாற்றிய செயற்கை நுண்ணறிவு நிறுவனத்தின் விஞ்ஞானத் திறமைமிக்க இந்த இளைஞர், நச்சுத்தன்மை கொண்ட பணிச்சூழல் மற்றும் சுரண்டலான மேலாளர் காரணமாகவே இத்துயரகரமான முடிவை எடுத்ததாக கூறப்படுகிறது (NDTV, மே 19, 2025). இன்றைய பணியிடங்கள், ஓநாய்களைப் போன்ற தலைவர்களால் வேட்டையாடும் இடங்களாக மாறிவருகின்றன. சிலர் நிபுணத்துவமான கடுமையான பணியாளர்களைப் போல இருக்கிறார்கள்; எகிப்தில் இருந்த ஆளோட்டிகள் போல, அவர்கள் மூலப்பொருள், அடிப்படை வசதிகள், பயிற்சி அல்லது வழிகாட்டுதல்களின்றி வேலையை மட்டுமே கோருகின்றனர் (யாத்திராகமம் 5:6-14). இத்தகைய தலைவர்கள், கூலி மேய்ப்பர்களைப் போல, ஆடுகளைப் பற்றிக் கவலைப்படாமல், அவற்றை ஓநாய்கள் போன்ற காட்டுமிருகங்களின் அபாயத்திற்கு விட்டுவிடுகின்றனர் (யோவான் 10:13). இந்த பொறியாளர் உயிரை மாய்த்துக்கொள்ள காரணமாக இருந்தது அவரது மேலாளரே என கூறப்படுகிறது.
வாய்மொழி துஷ்பிரயோகம்:
அவரது உரையாடல்கள் எப்போதும் திட்டும் வார்த்தைகளால் நிறைந்திருந்தன. மரியாதையான, நாகரீகமான, மென்மையான பேச்சு எதுவும் இல்லை. கிறிஸ்துவின் சீஷர்களாகிய நாம், கட்டியெழுப்பும், உற்சாகப்படுத்தும், நம்பிக்கை அளிக்கும் வார்த்தைகளையே பேச வேண்டும். படிப்பில் சிறந்து விளங்கி, தகுதி பெற்ற ஒரு பொறியாளரிடம் “திறமையற்றவன்” போன்ற சொற்களைப் பயன்படுத்துவது, அந்த மனிதனைத் தளரச்செய்து, மனத்தளர்ச்சியடையச் செய்கிறது.
அவமானப்படுத்துதல்:
மற்றொரு அடக்குமுறை கருவி, ஒருவரை மற்றவர்கள்முன் அவமானப்படுத்துவதாகும். “வேலையில்லாதவன், பயனற்றவன்” போன்ற சொற்களைப் பயன்படுத்துவது, அந்த நபரை இழிவுபடுத்தி, தாழ்த்துகிறது. ஒருவரை அவமானப்படுத்தும்போது, அவரின் கண்ணியமே பறிக்கப்பட்டுவிடுகிறது.
உணர்ச்சி ரீதியான மிரட்டல்:
பொல்லாத மேலாளர்கள், பயம், கட்டாயம், குற்றஉணர்ச்சி, தோல்வி, நிராகரிப்பு ஆகியவற்றைப் பயன்படுத்தி மனிதர்களை சூழ்ச்சியுடன் கட்டுப்படுத்துவதில் திறமைசாலிகள். பதவி உயர்வு, ஊக்கத் தொகை, அல்லது சிறந்த வாய்ப்புகளை மறுத்துவிடுவது சாதாரணமாக நடைபெறும் நிகழ்வாகவே உள்ளது.
பணிநீக்கம் என்ற மிரட்டல்:
பொருளாதாரம் வளர்ச்சி அடையாத நேரங்களில், வேலை இழப்பு மற்றும் குறைவான வேலைவாய்ப்பு ஆகியவை மிகப்பெரிய சவால்களாகின்றன. ஒரு பணியிடத்திற்காக ஏராளமானோர் போட்டியிடுகின்றனர். அதனால் தொழிலாளர்கள் குறைந்த கூலியையே ஏற்கத் தயாராகிறார்கள். இதை ஆயுதமாகக் கொண்டு, பொறுப்பில்லாத மேலாளர்கள் “நியமித்து – நீக்கும்” கொள்கையைப் பின்பற்றுகின்றனர். இது பலரின் மனதைத் தளரச்செய்கிறது. அது அவர்களின் மீது தொங்கும் “டமோக்ளீசின் வாள்” (எப்போது வேண்டுமானாலும் ஆபத்து) போலாகும். ஆனால், விசுவாசிகள் தங்கள் வேலையில் சிறந்து விளங்கவேண்டும். அச்சமுறாமல் இருக்கவேண்டும். ஏனெனில், ஒரு வாயில் மூடப்பட்டாலும், கடவுள் புதிய வாயில்களைத் திறந்து, சந்தர்ப்பங்களை அளிப்பார்.
குடும்பமும் சமுதாயமும்:
பல தொழிலாளர்கள், தங்கள் குடும்பத்தையும், சமுதாயத்தில் உள்ள தங்களின் கண்ணியத்தையும் காப்பாற்ற வேண்டும் என்ற கவலையால், தற்கொலையின் விளிம்பிற்கு தள்ளப்படுகின்றனர்.
யாக்கோபு ஒரு முன்மாதிரி:
உணர்வுகளற்ற சுரண்டலான லாபானின் கீழ் இருந்தபோதிலும், யாக்கோபு தேவனை நம்பினான்; வளம் பெற்று, இறுதியில் வெற்றியாளனானான்.
எனது பணியிடத்தில் கர்த்தர் என் மேய்ப்பராக இருக்கிறார் என்பதை அனுபவமாக கொண்டுள்ளேனா?
Rev. Dr. J.N. Manokaran