டிஜிட்டல் காலத்தில் தகவல்களின் உலகம் வேகமாக வளர்ந்ததால், இளம் பருவத்தினரும் (adolescents) இளைஞர்களும் மனஅழுத்தமும் அடையாளக் குழப்பமும் அனுபவிக்கிறார்கள். சிலர் மற்றவர்களை காயப்படுத்தும் அளவுக்கு கோபமடைகிறார்கள்; சிலர் தற்கொலைக்குத் கூட முயல்கிறார்கள். “நான் யார்?”
“நான் ஏன் இங்கு இருக்கிறேன்?”
என்ற கேள்விகள் மனித வரலாறு முழுவதும் கேட்கப்பட்டு வருகின்றன. மனிதன் தன்னைத்தானே பல விதமாக வரையறுக்க முயல்கிறான்.
1) நான் உயிர் பிழைக்கிறேன்; ஆகையால் நான் இருக்கிறேன்:
பழங்காலங்களில் உயிர் பிழைப்பதே பெரிய சவாலாக இருந்தது. உணவுக்காக வேட்டையாடுதல், காட்டு மிருகங்களிடமிருந்து பாதுகாப்பாக இருப்பது, உடல்நலத்தை காக்குதல், காலநிலைக்கு தகுந்து வாழ்தல் ஆகியவை முக்கியமானவை.
2) நான் உண்டு பண்ணுகிறேன்; ஆகையால் நான் இருக்கிறேன்:
பின்னர் மனிதன் கருவிகள் மற்றும் சாதனங்களை உருவாக்கத் தொடங்கினான். நெருப்பு, சக்கரம் மற்றும் பல கருவிகளின் கண்டுபிடிப்பு மனித முன்னேற்றத்தைத் தொடங்கியது. உலோகங்களின் கண்டுபிடிப்பும் இதற்கு உதவியது.
3) நான் சிந்திக்கிறேன்; ஆகையால் நான் இருக்கிறேன்:
அறிவியல் கண்டுபிடிப்புகள் மற்றும் அச்சுத்தொழில்நுட்பம் நவீன உலகை உருவாக்கின. மனிதர்கள் சிந்தித்தனர், விவாதித்தனர், ஆராய்ந்தனர், கண்டுபிடித்தனர், எழுதினர், புதியவற்றை உருவாக்கினர்.
4) நான் உணர்கிறேன்; ஆகையால் நான் இருக்கிறேன்:
பிந்தைய நவீன சிந்தனை (Postmodernism) உணர்ச்சிகளுக்கு முக்கியத்துவம் அளித்தது. ஒருவர் என்ன உணர்கிறாரோ அதையே அடைய வேண்டும் என்ற எண்ணம் வளர்ந்தது. தொழில் தேர்வுகளும் கூட உணர்ச்சிகளை அடிப்படையாகக் கொண்டன.
5) நான் படைக்கிறேன்; ஆகையால் நான் இருக்கிறேன்:
டிஜிட்டல் தொழில்நுட்பம் கலை மற்றும் படைப்பாற்றலுக்கு புதிய வாய்ப்புகளைத் திறந்தது. TikTok போன்ற செயலிகள் எவருக்கும் தங்களை வெளிப்படுத்தவும், படைக்கவும், உலகளாவிய மக்களிடம் காட்டவும் வாய்ப்பு அளித்தன.
செய்வது அல்ல; இருப்பதே முக்கியம்:
மனிதன் என்ன செய்கிறான் என்பதல்ல அவனை வரையறுப்பது.
அவன் யார்? அவன் எவ்வாறு உருவானான்? மற்ற உயிரினங்கள் தேவனுடைய வார்த்தையால் படைக்கப்பட்டன. ஆனால் ஆதாம் மண்ணிலிருந்து உருவாக்கப்பட்டு, தேவன் தமது சுவாசத்தை அவனுள் ஊதினார்; அப்பொழுது அவன் உயிருள்ள ஆத்துமாவானான்.
தேவனுடைய சாயல்:
மனிதன் தன்னைத்தானே வரையறுப்பது வீண் முயற்சியாகும். படைப்பாளர் தேவனே மனிதனை வரையறுக்க வேண்டும்; படைப்பு அல்ல. தேவன் ஆதாமையும் ஏவாளையும் தமது சாயலில் படைத்தார் (ஆதியாகமம் 1:27).
தேவனுடைய சாயலில் இருப்பது என்பது உயிர் பிழைப்பது, உருவாக்குவது, சிந்திப்பது, உணர்வது, படைப்பது ஆகியவற்றை மட்டுமல்ல; தேவனுடன் உறவாடும் ஆவிக்குரிய திறனை உடையவர்களாக இருப்பதையும் குறிக்கிறது.
தேவனை அறிதல், அவரால் அறியப்படுதல்; இதுவே மனிதனின் உண்மையான அடையாளம்.
மனிதர்கள் குரங்குகளின் சந்ததியோ அல்லது பிரபஞ்சத்தில் திசை தெரியாத அனாதைகளோ அல்ல.
தேவனுடைய பிள்ளை:
அவரை ஏற்றுக்கொள்ளுகிறவர்களுக்கு தேவனுடைய பிள்ளைகளாகும் அதிகாரம் கொடுக்கப்பட்டது (யோவான் 1:12). கிறிஸ்துவை ஏற்றுக்கொள்ளும் போது மனிதன் புதிய அடையாளத்தைப் பெறுகிறான் அதாவது தேவனுடைய பிள்ளை என்ற நித்திய அடையாளத்தை. அந்த அடையாளமே வாழ்க்கைக்கு அர்த்தத்தையும் நோக்கத்தையும் அளிக்கிறது.
கிறிஸ்துவில் எனக்கு ஒரு புதிய அடையாளம் இருக்கிறதா?
Rev. Dr. J.N. Manokaran