பல்வேறு விதமான வழிகளில் ஜனங்கள் முடிவு எடுக்கிறார்கள், செயல்படுகிறார்கள், நடந்துக் கொள்கிறார்கள். ஏதேனும் குறிப்பிட்ட முடிவுகளை எடுப்பதற்கு ஒருவித உந்துதல் அல்லது காரணம் இருக்கும். முடிவுகள் பகுத்தறிவின் அடிப்படையில் அல்லது உணர்வின் அடிப்படையில் அல்லது போலித்தனமாகவும் இருக்கலாம். உலகில் உள்ள பெரும்பாலான மக்கள் தங்கள் பழக்கவழக்கங்கள், மரபுகள், முன்னோர்களின் மாதிரி மற்றும் கலாச்சார நடைமுறைகளின் அடிப்படையில் முடிவுகளை எடுக்கிறார்கள். சிலர் சந்தர்ப்பவாதிகள் மற்றும் கொடுக்கப்பட்ட சூழலில் வசதிக்கேற்ப முடிவெடுக்கும் நடைமுறைவாதிகள் என்று கூறுகின்றனர். பழக்கவழக்கங்கள், கலாச்சாரம் மற்றும் வசதி ஆகியவை முடிவுகளை எடுப்பதற்கு சரியான அடிப்படை அல்ல. ஒரு கிறிஸ்தவர் எப்படி முடிவுகளை எடுக்க வேண்டும் என பார்க்கலாம். கிறிஸ்தவர்கள் வேதாகமத்தின் அடிப்படையில் நம்பிக்கையுடன் வாழ அழைக்கப்படுகிறார்கள்.
சத்தியம்:
கிறிஸ்தவர்கள் சத்தியமாய் இருக்கிற ஆண்டவராகிய இயேசு கிறிஸ்துவைப் பின்பற்றுபவர்கள் (யோவான் 14:6). தேவனுடைய வார்த்தையே சத்தியம், பரிசுத்த ஆவியானவர் சத்தியத்தின் ஆவி, சபை சத்தியத்தின் தூண், எனவே சத்தியத்தை வாங்குங்கள், அதை விற்காதீர்கள் (யோவான் 17:17, 16:13, 1 தீமோத்தேயு 3:15, நீதிமொழிகள் 23:23). வேதாகமத்தைப் படிப்பதினால், அந்த வார்த்தையை தியானிப்பதினால், ஒரு நபரின் மனது புதுப்பிக்கப்பட்டு, சத்தியத்தால் நிரம்புகிறது.
இராஜ்ஜியம்:
ஒரு சீஷன் எப்பொழுதும் தேவனுடைய ராஜ்யத்தையே முதன்மைப்படுத்துகிறான் (மத்தேயு 6:33). அப்படி அந்த சீஷன் ஒரு முடிவை எடுக்கும்போது, அது தேவ ராஜ்யத்தை மேம்படுத்துமா, வளர்ச்சியடைய செய்யுமா, விரிவுபடுத்துமா என்பதை அந்நபர் தற்பரிசோதனை செய்கிறார். உம் இராஜ்ஜியம் வரட்டும் என்பது வெற்று முழக்கம் அல்ல, அது உண்மையாகவே தேவ பிள்ளையின் முன்னுரிமை.
நீதி:
ஒரு சீஷனின் மதிப்புகள் கலாச்சாரம், பழக்கவழக்கங்கள் அல்லது உலகின் போக்குகளிலிருந்து பெறப்பட்டவை அல்ல, மாறாக தேவ வார்த்தையிலிருந்து பெறப்படுகின்றன. நீதி என்பது தேவனுடைய பார்வையில் பரிசுத்தமானது, தார்மீக ரீதியாக சரியானது மற்றும் ஆவிக்குரிய ரீதியில் பொருத்தமானதைச் செய்வதாகும்.
ஆவியின் கனி:
ஒரு கிறிஸ்தவன் அன்பு, சந்தோஷம், சமாதானம், பொறுமை, தயவு, நற்குணம், விசுவாசம், சாந்தம், சுய கட்டுப்பாடு என்பதான ஆவியின் கனிகளைத் தந்து பலன் தரும்படி பரிசுத்த ஆவியின் உதவியை முன்கூட்டியே நாடுகிறான் (கலாத்தியர் 5:23).
தேவ சித்தம்:
ஒரு சீஷன் எல்லா சூழ்நிலைகளிலும் தேவ சித்தத்தை நாடுகிறான். தேவனின் சித்தம், திட்டம் மற்றும் நோக்கம் ஆகியவை ஒரு விசுவாசிக்கு நன்மையும், பிரியமும் மற்றும் பரிபூரணமானதும் ஆகும் (ரோமர் 12:2). தேவ சித்தத்தைப் பகுத்தறிந்து செய்கிறவர்கள் என்றென்றும் நிலைத்திருப்பார்கள் (1 யோவான் 2:17).
நான் பாரம்பரிய கலாச்சாரத்தை பின்தொடர்கிறேனா அல்லது தேவ இராஜ்ஜிய நெறிகளை முன்வைத்து பின்பற்றுகிறேனா?
Author: Rev. Dr. J .N. மனோகரன்
Rev. Dr. J.N. Manokaran