பெண்களின் உரிமைகள்

பெண்களின் உரிமைகள் அல்லது சம உரிமைகளுக்காகப் பல இயக்கங்கள் குரல் கொடுத்து வருகின்றன. ஐக்கிய நாடுகள் சபையும் (UN) பல நாடுகளும் பெண்களுக்கு உரிமைகளை வழங்குவதற்கான கொள்கைகளைக் கொண்டுள்ளன. ஆனால், வேதாகமம் பெண்களுக்கு தேவன் அளித்துள்ள உரிமைகளைப் பற்றி போதிக்கிறது.

சாயல்:
தேவன் ஆதாமையும் ஏவாளையும், அதாவது முதல் தம்பதியினராகப் படைத்தார்; அவர்கள் தேவ சாயலிலேயே படைக்கப்பட்டனர் (ஆதியாகமம் 1:27). தேவனுடைய சில பண்புகளும் திறன்களும் அவர்களுக்கு வரமாக அளிக்கப்பட்டிருந்தன. அவர்களுக்குச் சில சிறப்புரிமைகளும் பொறுப்புகளும் இருந்தன. அந்தச் சிறப்புரிமைகளில் நித்திய ஜீவனும் (முடிவில்லா வாழ்வும்) அடங்கும். வீழ்ச்சிக்குப் (பாவத்திற்குப்) பிறகு, ஒருவன் தன் நித்தியத்தை பரலோகத்திலோ அல்லது நரகத்திலோ கழிக்க வேண்டியதாயிற்று.

ஏதேன் தோட்டத்தில் ஏவாள்:
மனிதகுலத்தின் முதல் இருப்பிடம் ஏதேன் தோட்டமாகும். ஆதாமும் ஏவாளும் தோட்டத்தைச் சுற்றித் திரியும் சுதந்திரத்தைப் பெற்றிருந்தனர்; ஆனால், தோட்டத்தின் நடுவில் இருந்த ஒரு மரத்தின் கனியைப் புசிக்க அவர்களுக்குத் தடை விதிக்கப்பட்டிருந்தது (ஆதியாகமம் 3:3). ஒருவேளை, அவர்கள் இருவரும் ஒன்றாகச் சுற்றித் திரிந்திருக்கலாம்; அல்லது சில நேரங்களில், வெவ்வேறு திசைகளை உற்றுநோக்குவதற்காக ஒவ்வொருவரும் தனித்தனியாகச் சென்றிருக்கலாம்.

சுயாதீனமான முடிவு:
ஏவாளுக்குப் பாம்புடன் பேசுவதற்கான சுதந்திரம் இருந்தது; தான் சாத்தானுடன்தான் பேசிக்கொண்டிருக்கிறோம் என்பதை அவள் அப்போது உணர்ந்திருக்கவில்லை. தடை செய்யப்பட்ட அந்தக் கனியைப் புசிப்பதற்கான சுயாதீனமான முடிவையும் அவளே எடுத்தாள் (ஆதியாகமம் 3:6). ஆதாமிற்கு வழங்கப்பட்டது போலவே, ஏவாளுக்கும் 'சுயவிருப்பம்' (freewill) அளிக்கப்பட்டிருந்ததால், தனக்கான முடிவைத் தானே எடுக்கும் உரிமையை தேவன் அவளுக்கு வழங்கியிருந்தார்.

பொறுப்புடைமை:
தடை செய்யப்பட்ட கனியைப் புசித்த செயலுக்கு ஆதாம் மற்றும் ஏவாள் ஆகிய இருவருமே பொறுப்புடையவர்களாய் இருந்தனர். தேவன் அவர்கள் இருவரையும் தனித்தனியாகச் சந்தித்து, அவர்களின் செயலுக்கான விளக்கத்தைக் கேட்டார்.

தேவனிடம் பேசும் வாய்ப்பு:
முதல் பாவியான ஏவாளுக்கும், அந்த நிகழ்வில் அவளது பங்கைப் பற்றிப் பேசி விளக்குவதற்கான வாய்ப்பை தேவன் வழங்கினார். தேவன் ஆதாமை நிர்மூலமாக்காதது போலவே, ஏவாளையும் அவர் நிர்மூலமாக்கவில்லை. ஏனெனில், அவர்கள் இருவருமே தேவ சாயலிலேயே படைக்கப்பட்டிருந்தனர்.

ஸ்திரீயின் வித்து:
மீட்பராகிய மேசியா (கிறிஸ்து), ஒரு ஸ்திரீயின் (பெண்ணின்) வித்தாகவே தோன்றுவார் என்று தேவன் வாக்களித்தார் (ஆதியாகமம் 3:15). கர்த்தராகிய இயேசு கிறிஸ்து கன்னி மரியாள் மூலம் பிறந்தார் . அவர் உயிர்த்தெழுந்த பிறகு, முதன்முதலில் ஒரு பெண்ணுக்கே;  அதாவது மகதலேனா மரியாளுக்கே தரிசனமானார் 

தேவனுடைய பிள்ளை:
ஆண்களைப் போலவே, பெண்களுக்கும் கர்த்தரைத் தங்கள் இரட்சகராக ஏற்றுக்கொண்டு, ஜீவனுள்ள தேவனுடைய பிள்ளைகளாகும் உரிமை வழங்கப்பட்டுள்ளது (யோவான் 1:12).

தேவன் பெண்களை எப்படிக் கருதுகிறாரோ, அதே கண்ணியத்துடன் நானும் அவர்களை மதிக்கிறேனா?

Rev. Dr. J.N. Manokaran