நெகேமியா ஒரு சிறந்த உந்துசக்தியாளர், மக்களைத் திரட்டுபவர், குழுவை உருவாக்குபவர், மற்றும் ஒரு தாழ்மையான தலைவர். 52 நாட்களுக்குள் அவர் எருசலேம் நகரைச் சுற்றியுள்ள மதிலைக் கட்டி முடித்த விதம் ஆச்சரியமளிக்கிறது (நெகேமியா 6:15). எழுபது ஆண்டுகளுக்கும் மேலாக (சிலரின் மதிப்பீட்டின்படி 114 ஆண்டுகள்) மதிலில்லாமல் நகரம் அவமானத்தில் இருந்தது. ஆனால், அந்த பெளதிக மதில் மீண்டும் கட்டப்பட்டது. ஆனால், அதைவிட பெரிய பணி அந்த நகரத்தை மீண்டும் மக்களால் நிரப்புவதாகும். நகரத்தின் மகிமையை மீட்டெடுக்க, மக்கள் நகரில் குடியிருக்க வேண்டும் என்று நெகேமியா அவர்களை உற்சாகப்படுத்த வேண்டியிருந்தது.
செழிப்பு (Prosperity):
பல்லாண்டுகளாக எருசலேம் ஒரு பாழடைந்த நகரத்தைப் போல இருந்தது. எஸ்றா தேவாலயத்தைக் கட்டினார், நெகேமியா மதிலைக் கட்டினார். ஆனால், அங்கே இன்னும் அதிக மக்கள் தேவைப்பட்டனர்.
வளம் மற்றும் வலிமை (Resource and strength):
ஒரு நகரத்தில் அதிக மக்கள் இருக்கும்போதுதான், உட்கட்டமைப்பு மேம்பாடும், தற்காப்பு அரண்களும் வலுப்பெறும். அதன் மூலம் நகரம் மீண்டும் தாக்கப்படாமல் பாதுகாக்கப்படும்.
தலைவர்கள் ஒரு முன்மாதிரியாக:
மக்களின் தலைவர்கள் நகரத்தில் குடியேறி, அங்கு தங்குவதற்கு ஒரு முன்மாதிரியாக இருக்க வேண்டும் என்பதை நெகேமியா உறுதி செய்தார். தலைவர்கள் கோழைகளாகவும் இருக்கக்கூடாது; ஆபத்து, எதிர்ப்பு, மற்றும் அபாயங்களை எதிர்கொள்ளத் தயாராக இருக்க வேண்டும்.
பத்தில் ஒரு பங்கு:
மக்களை நகரத்தில் குடியேற்ற நெகேமியா ஒரு முறையை நடைமுறைப்படுத்தினார். எருசலேம் பகுதியைச் சுற்றியுள்ள மக்களில் பத்து சதவீதத்தினரைத் தேர்ந்தெடுத்து, அவர்களை நகரத்திற்கு மாற்ற அவர் ஒரு குலுக்கல் முறையைப் பயன்படுத்தியிருக்கலாம்.
குடிபெயர்ந்தவர்களுக்கு சவால்கள்:
பரிசுத்த நகரின் குடிமக்களாக இருப்பது ஒரு பாக்கியமாக இருந்தாலும், பல சவால்களும் இருந்தன. முதலாவதாக, அவர்கள் தங்களின் பொருட்கள் மற்றும் நிதி நிலையை மீளமைக்க வேண்டியது அவசியமாக இருந்தது. புதிய வேலைகளை ஏற்க வேண்டும், அல்லது புதிய தொழில்கள் தொடங்க வேண்டியது இருந்தது. இரண்டாவதாக, அவர்களின் சமூக வாழ்க்கையை மறுவழிநடத்த வேண்டி இருந்தது. பலர் தங்கள் உறவினர்கள், அயலவர்கள், நண்பர்கள் ஆகியோரிடமிருந்து தொலைவில் வாழ வேண்டியிருந்தது. மூன்றாவதாக, நகரம் பராமரிக்கப்படாமலிருந்ததால், அதை மீண்டும் கட்டமைக்க வேண்டியிருந்தது. பொது இடங்கள், சாலைகள் மற்றும் பிற அடிப்படை வசதிகள் மீண்டும் கட்டமைக்கப்பட வேண்டும். நான்காவதாக, அந்த நகரம் பகை நாடுகளால் தாக்கப்படும் இலக்காக இருக்க வாய்ப்பு இருந்தது.
புதிய எருசலேம்:
புதிய நகரம் பரலோகத்திலிருந்து பூமிக்கு இறங்கி வருகிறது (வெளிப்படுத்துதல் 21:2). வருந்தத்தக்க வகையில், நெகேமியாவின் எருசலேமில் குடியேற பல காரணங்களையும் ஆபத்துக்களையும் கூறி மக்கள் தயங்கியது போலவே, இன்றும் பலர் புதிய எருசலேமின் குடிமக்களாக இருக்க விரும்பவில்லை.
புதிய எருசலேமில் வசிக்க நான் மகிழ்ச்சியுடன் எதிர்பார்க்கிறேனா அல்லது தயங்குகிறேனா?
Rev. Dr. J.N. Manokaran