தாஜ்மஹால் அன்பின் நினைவுச்சின்னமாகக் கருதப்படுகிறது. உலகின் ஏழு அதிசயங்களில் ஒன்றாக இது இருப்பதால், உலகம் முழுவதிலும் உள்ள மக்கள் அதை ஒருமுறையாவது பார்வையிட விரும்புகிறார்கள். அந்தக் கட்டிடம் அழகாகவும், கம்பீரமான கட்டிடக்கலையாகவும், எடுத்துக்காட்டாகவும் இருக்கிறது. ஆனால், இது வெறும் சமாதியாகும் என்பதைக் குறைவானவர்கள் மட்டுமே உணர்கிறார்கள்; இது பார்வையாளர்களுக்கு நம்பிக்கையைக் கொடுப்பதில்லை. இருப்பினும், சிலர், ஷாஜகான் மும்தாஜை நேசித்தது போல், தங்களது மனைவிகளை நேசிக்க ஊக்கமடையக்கூடும்.
வெற்று கல்லறை:
உண்மையான அன்பின் சமாதி என்பது எருசலேமில் உள்ள காலிச் சமாதியே ஆகும். மனிதர்களின் பாவங்களுக்காக உயிரிழந்த தேவனுடைய குமாரர் அங்கே அடக்கம் செய்யப்பட்டார். ஆதாமும் ஏவாளும் பாவம் செய்ததிலிருந்து, முழு மனிதகுலமும் பாவத்தின் இயல்பு மற்றும் விளைவுகளை அனுபவித்து வந்தது. இரத்தம் சிந்தாமல் பாவ மன்னிப்பு இல்லை (எபிரெயர் 9:22). மிருகங்களின் இரத்தமும், பாவமுள்ள மனிதர்களின் இரத்தமும் பாவங்களை பரிகாரமாக்குவதற்குப் போதுமானதல்ல. எனவே, கடவுளின் மகன் மனிதனாக மாறுவது அவசியமாக இருந்தது. அவர் பெத்லகேமில் பிறந்து, நாசரேத்தில் வளர்ந்து, எருசலேம், கலிலேயா, யூதேயா மற்றும் சமாரியாவில் ஊழியம் செய்தார். எருசலேம் நகரத்திற்குப் வெளியே சிலுவையில் அறையப்பட்டார், ஒரு தோட்டக் கல்லறையில் அடக்கம் செய்யப்பட்டார், மூன்றாவது நாளில் உயிர்த்தெழுந்தார். ஆண்டவராகிய இயேசு மனித குலத்தின் பாவங்களைச் சிலுவையின்மேல் சுமந்தார் (1 பேதுரு 2:24) என்று பேதுரு எழுதுகிறார்.
இரட்சிப்பின் வாக்குறுதி:
மனிதர்கள் எல்லாரும் பாவம் செய்து தங்கள் மகிமையை இழந்துவிட்டார்கள். பாவத்தின் சம்பளம் மரணம் (ரோமர் 3:23; 6:23). தேவனுடைய குமாரன் மனிதர்களுக்கு ஜீவன் கொடுக்க, பாவத்தின் சம்பளமான மரணத்தைத் தன் மீது ஏற்றுக்கொண்டார். அவரது உயிர்த்தெழுதலின் மூலம், கர்த்தர் தனது தெய்வீகத்தன்மையையும் பாவங்களை மன்னிக்கும் அதிகாரத்தையும் அறிவித்தார். ஆண்டவராகிய இயேசுக் கிறிஸ்துவின்மீது நம்பிக்கை வைக்கும் அனைவரும் தங்கள் பாவங்களில் இருந்து சுத்திகரிக்கப்பட்டு, நீதிமான்களாக அறிவிக்கப்பட்டு, தேவனுடைய பிள்ளையாகும் உரிமையைப் பெறுகிறார்கள், மேலும் அவருடைய குடும்பத்தில் சேர்க்கப்படுகிறார்கள் (யோவான் 1:12).
நித்திய மாளிகை:
இந்த உலகில் உள்ள அன்புக்குரியவர்கள் தாங்கள் விரும்பியவர்களுக்கு நினைவாக தாஜ்மஹால் போன்ற நினைவுச் சின்னங்களை கட்ட தங்களால் இயன்றதைச் செய்ய முடியும். ஆனால் ஆண்டவராகிய இயேசுக் கிறிஸ்து, நித்திய ஜீவனையும், தேவனோடு நித்திய ஐக்கியத்தையும், நித்திய குடியிருப்பையும் அளிக்கிறார் (யோவான் 14:1). விசுவாசத்துடன் அவரிடம் வருகிறவர்கள் பலனடைவார்கள்.
என் பாவங்கள் மன்னிக்கப்பட்டு நான் நித்திய ஜீவனைப் பெற்றிருக்கிறேனா?
Rev. Dr. J.N. Manokaran