இப்போது கிரியை செய்கிற ஆவி

ஆவிக்குரிய குருட்டுத்தன்மையும், ஆவிக்குரிய இருளும் உண்மையான நிலைகளாகும். ஆனால், அநேகர் அவற்றை உணரத் தவறுகின்றனர். விலக்கப்பட்ட கனியைப் புசித்தால் தங்கள் கண்கள் திறக்கப்படும் என்று பாம்பின் மூலம் சாத்தான் ஏவாளிடம் வாக்குப்பண்ணினான். ஆனால் உண்மையில், அந்தச் செயல் அவர்களை ஆவிக்குரிய குருட்டுத்தன்மைக்குள் கொண்டுசென்றது (ஆதியாகமம் 3:5; 2 கொரிந்தியர் 4:4).
மனிதர்கள் அனைவரும் பாவிகளே. சாத்தான் மனிதர்களுக்குள் தீவிரமாகச் செயல்படுவதோடு, அவர்களின் மூலமாகவும் செயல்படுகிறான்.

அந்திக்கிறிஸ்துவின் ஆவி
மனிதகுலத்தை இரட்சிப்பதற்காக தேவன் தம்முடைய குமாரனை உலகத்திற்கு அனுப்பினார். அவரை விசுவாசிக்கிற எவனும் கெட்டுப்போகாமல் நித்திய ஜீவனை அடைய வேண்டும் (யோவான் 3:16).
ஆனால், தேவனுடைய குமாரனாகிய இயேசு கிறிஸ்து மாம்சத்தில் வந்தார் என்பதை சிலர் மறுக்கின்றனர். கர்த்தராகிய இயேசு கிறிஸ்துவின் மாம்சமாகுதலை அவர்கள் மறுதலிக்கின்றனர். அவர் பெத்லகேமில் பிறந்து, நாசரேத்தில் வளர்ந்து, கலிலேயா, யூதேயா மற்றும் சமாரியாவில் ஊழியம் செய்தார்; எருசலேமுக்கு வெளியேயுள்ள கொல்கொதாவில் சிலுவையில் அறையப்பட்டார்; அடக்கம் செய்யப்பட்டார்; பின்னர் மரித்தோரிலிருந்து உயிர்த்தெழுந்தார். இவ்வாறு கிறிஸ்துவின் மாம்சமாகுதலை மறுப்பவர்கள் அந்திக்கிறிஸ்துவின் ஆவியின் தாக்கத்திற்கு உட்பட்டவர்கள் என்று அப்போஸ்தலனாகிய யோவான் குறிப்பிடுகிறார்.

கீழ்ப்படியாமையின் ஆவி
எபேசு சபை விசுவாசிகளுக்கு, தங்கள் பாவங்களாலும் மீறுதல்களாலும் மரணத்திற்குரிய நிலையில் இருந்த அவர்கள் கிறிஸ்துவுக்குள் இரட்சிக்கப்பட்டதைப் பவுல் நினைவுபடுத்துகிறார். அதேவேளையில், கிறிஸ்துவுக்குள் இல்லாதவர்களிடத்தில் கீழ்ப்படியாமையின் ஆவி செயல்படுகிறது என்று குறிப்பிடுகிறார் (எபேசியர் 2:1–2).
அதனால், அவர்கள் சுவிசேஷத்தின் அழைப்பிற்கும் தேவனுடைய கட்டளைகளுக்கும் கீழ்ப்படிய முடியாதவர்களாக இருக்கிறார்கள்.

மயக்கத்தின் ஆவி
இஸ்ரவேல் தேசம் கிறிஸ்துவை நிராகரித்தது. அதற்கான காரணங்களில் ஒன்று, அவர்களிடத்தில் இருந்த மயக்கத்தின் ஆவி அல்லது ஆவிக்குரிய உணர்வின்மையாகும். அதாவது, விசுவாசத்தின் மூலம் சத்தியத்தை உணர்ந்து ஏற்றுக்கொள்ள இயலாத நிலை (ரோமர் 11:8). அவர்களிடம் நியாயப்பிரமாணமும், வாக்குத்தத்தங்களும், ஆலயமும், பத்துக் கட்டளைகளும், உடன்படிக்கையும் இருந்தன. இருந்தபோதிலும், மேசியாவாகிய கிறிஸ்துவை அவர்கள் விசுவாசிக்கவில்லை. சத்தியத்தை உணரவும், அதைத் தேடி பின்பற்றவும் முடியாததற்கு இந்த ஆவிக்குரிய மயக்கமே காரணமாக இருந்தது.

பயத்தின் ஆவி
சிலர் பயத்தின் ஆவியால் ஆட்கொள்ளப்பட்டிருக்கிறார்கள். ஆனால், விசுவாசிகளுக்கு தேவன் பயத்தின் ஆவியைக் கொடுக்கவில்லை; பலத்தின் ஆவியையும், அன்பின் ஆவியையும், தெளிந்த புத்தியையும் கொடுத்திருக்கிறார் என்று பவுல் உறுதியாகக் கூறுகிறார் (2 தீமோத்தேயு 1:7). மேலும், சாத்தானால் உண்டாகும் மரண பயத்திலிருந்தும் கர்த்தர் தம்முடைய மக்களை விடுவித்திருக்கிறார். மரணத்திற்குப் பயந்து வாழ்ந்தவர்களை அந்தப் பயத்தின் அடிமைத்தனத்திலிருந்து விடுவிப்பதற்காக கிறிஸ்து வந்தார் (எபிரெயர் 2:14–15).

உலகத்தாரால் பெற்றுக்கொள்ள முடியாத சத்திய ஆவியானவரை நான் பெற்றிருக்கிறேனா? (யோவான் 14:17)

Rev. Dr. J.N. Manokaran