தேவபக்தியில் வெளிப்படும் கிருபை

போராடிக்கொண்டிருந்த குழுக்களுக்கிடையே சமரசத்தையும் ஒப்புரவையும் ஏற்படுத்துவதற்காக பணியாற்றிக் கொண்டிருந்தபோது, திரு. டாக்டர் வும்தாங் சித்லோ (Thadou Baptist Association தலைவர்), திரு. கைஃகௌலுன் லௌவும (Thadou Baptist Association நிதிச் செயலாளர்), மற்றும் பாஸ்டர் பாவ்கௌலென் சித்லோ (Thadou Baptist Association கண்காணிப்பு போதகர்) ஆகிய மூவரும் 13 மே 2026 அன்று சுட்டுக் கொல்லப்பட்டனர்.
பாஸ்டர் வும்தாங் சித்லோ அவர்களின் மகன் ஹவோமின்லுன், மோட்புங் நகரிலுள்ள Thadou Baptist Association வளாகத்தில் நடைபெற்ற தனது தந்தையின் இறுதிச்சடங்கின்போது; “என் தந்தையைக் கொன்றவர்களை ஆண்டவரின் நாமத்திலும், பரந்த சமாதானத்தின் நலனைக் கருத்தில்கொண்டும் நான் மன்னிக்கிறேன்” என்று கூறினார்.

கிருபையின் தாக்கம்:
“தேவனுடைய கிருபையானது இரட்சிப்பை அளிக்கத்தக்கதாக எல்லா மனிதருக்கும் வெளிப்பட்டிருக்கிறது. அது நாம் அவபக்தியையும் உலகப்பிரகாரமான இச்சைகளையும் வெறுத்து, இப்பிரபஞ்சத்தில் தெளிந்த புத்தியோடும் நீதியோடும் தேவபக்தியோடும் வாழும்படியாக நம்மைப் பயிற்றுவிக்கிறது” என்று பவுல் எழுதுகிறார். மேலும், நாம் நற்கிரியைகளில் ஆர்வமுள்ளவர்களாக இருக்க வேண்டும் என்றும் அவர் போதிக்கிறார் (தீத்து 2:11–14).

துறப்பதற்கான பயிற்சி:
தேவனுடைய கிருபை, துன்பம், உபத்திரவம், தனிமை மற்றும் துயரம் ஆகியவற்றின் பள்ளிக்கூடத்தில் விசுவாசிகளைப் பயிற்றுவிக்கிறது. சில நேரங்களில், புதிதாகக் கற்றுக்கொள்வதற்கு முன்பாக, பழையவற்றை விட்டுவிடக் கற்றுக்கொள்வது அவசியமாகிறது. தேவனுடைய கிருபை விசுவாசிகளை மூன்று காரியங்களைத் துறக்கச் செய்கிறது; அவபக்தி, உலகப்பிரகாரமான இச்சைகள்,
அக்கிரமம். ஹவோமின்லுன் தேவனுடைய கிருபையை அனுபவித்தார். தனது தந்தையைக் கொன்றவர்களைப் பழிவாங்க வேண்டும் என்ற அவபக்தியான ஆலோசனையை அவர் நிராகரித்தார். வெறுப்பு என்ற உலகப்பிரகாரமான ஆசைக்கு அவர் இடமளிக்கவில்லை. அக்கிரமமான வன்முறையையும் அவர் ஏற்றுக்கொள்ளவில்லை. அதற்குப் பதிலாக, தன் தந்தையைக்  கொலை செய்தவர்களை மன்னிப்பதைத் தேர்ந்தெடுத்தார். இழப்பும் துயரமும் நிறைந்த சூழ்நிலையிலும், தேவனுடைய கிருபை அவரது எளிய வார்த்தைகளின் மூலம் தெளிவாக வெளிப்பட்டது.

நற்கிரியைகளில் ஆர்வம்:
இந்த உலகத்தின் மதிப்பீடுகளுக்கு மாறுபட்ட வாழ்க்கையை வாழ்கிறவர்களாகிய கர்த்தராகிய இயேசு கிறிஸ்துவின் சீஷர்கள், நற்கிரியைகளில் ஆர்வமும், வாஞ்சையும், உற்சாகமும், ஆவலும் கொண்டவர்களாகவும், நன்மை செய்ய எப்போதும் ஆயத்தமுள்ளவர்களாகவும் இருக்க வேண்டும். தன் தந்தையைக் கொன்றவர்களை மன்னித்ததன் மூலம் ஹவோமின்லுன் ஒரு நற்கிரியையைச் செய்தார். சிலுவையில் அறையப்பட்டபோது தம்மைத் துன்புறுத்தியவர்களுக்காக, “பிதாவே, இவர்களை மன்னியும்” என்று ஜெபித்த கர்த்தராகிய இயேசு கிறிஸ்துவின் முன்மாதிரியை அவர் பின்பற்றினார் (லூக்கா 23:34). ஹவோமின்லுன் உலகத்தின் மதிப்பீடுகளுக்கு முன்பாகத் தலைவணங்க மறுத்தார். கர்த்தருக்கு மட்டுமே தன்னைத் தாழ்த்தி, சத்தியத்திற்கும் ஒப்புரவிற்கும் ஆதரவாக நின்றார்.

பாக்கியமுள்ள நம்பிக்கை:
ஹவோமின்லுனிடம் “பாக்கியமான நம்பிக்கை” இருந்தது. தன் தந்தை இப்போது நித்திய இளைப்பாறுதலுக்குள் பிரவேசித்துவிட்டார் என்றும், அவர் கர்த்தருக்குள் பாக்கியவானான பரிசுத்தவானாக இருக்கிறார் என்றும் அவர் உறுதியாக நம்பினார்
(வெளிப்படுத்தின விசேஷம் 14:13).
ஒருநாள் தேவனுடைய சந்நிதியில் தன் தந்தையை மீண்டும் சந்திப்பேன் என்ற நிச்சயமும் அவருக்கு இருந்தது. எதிர்காலத்திற்கான இந்தப் பாக்கியமான நம்பிக்கை, நிகழ்காலத்தை மாற்றுகிறது; கடந்த காலத்தையும் புதிய நோக்கத்துடனும் புதிய அர்த்தத்துடனும் பார்க்கச் செய்கிறது.

தேவனுடைய கிருபையினால் நான் பயிற்றுவிக்கப்பட்டிருக்கிறேனா? கிறிஸ்துவில் எனக்கு பாக்கியமான நம்பிக்கை இருக்கிறதா?

Rev. Dr. J.N. Manokaran